ليه مش أحسن قرار ان كل سؤال مش عارف اجابته في الـinterview ترد تقول "معرفش"؟ انا كنت اتكلمت بسرعة في @egyptjs عن النظرية بتاعت The unknown unknowns .. النظرية او هرم المعرفة The knowledge Pyramid مفيدة في طريقة تقييمك لنفسك وللي حوليك والأهم لتقييم أي حد انت بتعمله interview ..

هاشرح بسرعة معنى كل واحدة من الأربع أجزاء في الهرم ده:

1-Known known: حاجات بتعرف تعملها وانت عارف كده، مثلاً انك بتعرف ازاي تخطط لتسليم مشروع ومتعوّد انك تعمل ده ومحتاج بس تنفذ اللي انت عارفه

2-Known Unknown: حاجات انت عارف انك محتاج تذاكرها او تتعلمها علشان متعرفش بيتعمل فيها ايه وازاي .. انت عارف انك علشان يوصلك المشروع اللي هتخطط لتنفيذه لازم يكون اتعمله دراسة جدوى، انت عارف المصطلح بس لو اتطلب منك النهاردة تعمل دراسة جدوى فا انت مش هتعرف وهتحتاج تدرس وتتعلم

3-Unknown Known: وانت بتخطط لتسليم المشروع بتاعك بتقعد تشوف ازاي تقلل خطورة العوامل اللي ممكن تأخر التسليم زي ان الناس تمشي او تتعب او يحصل مشكلة في التنفيذ، وكل مرة بتعمل كده بتطلع توقعاتك صح وبتبقى ناجح انك مش بتلبس في الحيط، بس مش عارف ان ده علم اسمه Risk Management

4-Unknown Unknown: حاجة مش عارف انها موجودة، ومش عارف ايه نوع السؤال اللي ممكن يخليك تسمع عنها وماتعرضتش لمشكلة تعرفك ان الحل هو x .. يعني لو بتعمل خطة تسليم المشروع في اسبوعين بس ماتعرفش ان فيه tool/platform ممكن يساعدك تقلل المدة للربع مثلاً .. انت متعرفش ان فيه حاجة كده أصلاً

شرح مبسط هنا بيقول انه لو انت عارف السؤال والاجابة فا انت بس هتفتكر الموضوع وتشتغل .. لو مش عارف الاجابة بس سؤالك واضح هيبقى هتدوّر وتتعلم .. لو عارف اجابة سؤال متعرفهوش يبقى بتمشي بالفطرة/البديهة او بالفهلوة .. لو لا ده ولا ده يبقى نقطة عمياء بالنسبة لك ..

في كل مرحلة في الشغل ومع عدد سنين خبرة معين بتختلف أهمية كل نقطة من الأربعة، مثلاً في أول سنة او اتنين انت محتاج تبقى شاطر في حاجات قليلة عارف تنفذهم كويس وبالتالي تفتحلك فرص، وفي نفس الوقت تسمع عن حاجات تبقى عارف انك مش ضروري تعرفها دلوقتي بس هتحتاجها بعدين أكيد ..

لما توصل ٥-٦ سنين محتاج يكون عندك صنعة/craft قوية في جزء معين وفي نفس الوقت يكون عندك معرفة بسيطة او سطحية لحاجات كتير أوي تخليك مرن كفاية انك تشتغل على اكتر من حاجة او تدخل في نقاشات متنوعة مع ناس كتير من غير ما يبقى تفكيرك محدود بالجزء اللي انت شاطر فيه بس ..

لو وصلت لـ١٠ سنين ولسه مش عارف غير لغة برمجة او اتنين ونوع واحد من قواعد البيانات يبقى انت في مشكلة، سببها ببساطة انك دايمًا كل حاجة هتقابلك مش هتعرف تفكر في حلول بره حدود الـknown knowns بتاعتك ولو الـknown unknowns محدودة يبقى كده سنين خبرتك صعب تفيد بيها شركات او افراد تانيين

ناس زي principles او software architects دول أهم حاجة ان يكون عندهم توسع في المعرفة يشمل حاجات كتير جدًا ومش شرط يكونوا طبقوا كل حاجة بنفسهم بس يقدروا يوجهوا الشركة انهم يدوروا او يذاكروا كذا حاجة ويشوفوا سوا الحل الأنسب ليهم ..

في الـevent كان فيه نقاش حولين نقطة هل لو اتسألت سؤال متعرفهوش هتجاوب وتفتي ولا هتقول ماعرفش .. معظم الناس قالت اننا نقول معرفش، وده صح بس انا مع ان الشخص يقول انه ماتعرضش لحاجة زي دي قبل كده بس ممكن نستخدم او نعمل كذا.. هنا بيحاول يستخدم اجزاء الـknown unknowns او unknown knowns

انا لو باعمل انترڤيو هاهتم انه يوريني قد ايه الجزئين دول عنده من المعرفة فيهم معلومات وافكار كويسة لأن ده معناه انه بيعرف يذاكر ويدوّر ويتصرف ومايعتمدش بس على الحاجات اللي عرف بتتعمل ازاي ويعطل قدام أي حاجة جديدة بالذات لو الشخص ده سنين خبرته كبيرة او مقدّم على دور مهم في الشركة

صعوبة الشغل + نوع الشركة + الفلوس اللي بتعرضها هي عوامل بتفرق في تقييم الشخص اللي بيعملك انترڤيو .. فيه اوقات شركات معندهاش وقت وفلوس تستثمر انها تحوّل الـknown unknowns لحاجات تعرفها كويس وبالتالي عاوزة تجيب واحد جاهز يطلع قماش من اول شهر ..

كل فترة باشوف انا بقيت فين وخبراتي مع الوقت بقت بتخلي شكل الهرم بتاعي عامل ازاي وهل ده ميزة اني عرفت حاجات كتير ولا خطر علشان الـcraft بتاعتي كفاءتها بتقل مع الوقت ومحتاج اذاكر بتعمّق .. ثريد طويل، شكرًا انك وصلت لحد هنا وأتمنى متكونش كرهتني علشان الكلمتين اللي شبه بعض دول 😊

💡 تقدروا تلاقوا تفاصيل ومناقشات أكتر حول الموضوع ده في الـthread ده على twitter، شكرًا ..