[Arabic] How to deal with “The Incompetent Nice Guy” as a Manager

‏عارف زميلك في الشغل اللي بتسأل نفسك دايمًا هو ازاي مكمّل مع انه مش شاطر ومش مجتهد؟ سؤالك مش بيطوّل علشان بترجع تقول "ازاي بافكر كده؟ ده لطيف والكل بيحبه ومش بيضايق حد، حرام أفكر كده!"

‏الحقيقة دي مشكلة بتواجه ناس كتير، وهي مشكلة الـincompetent nice guy/ الشخص اللطيف غير الكفء ⬇️

‏زميلك اللي بيسأل عليك كل شوية وبيبعتلك لو فريقك اللي بتشجعه كسب، بيتطمن على ابنك لو انت اخدت اجازة علشان تعبان، بيعمل أوردر الفطار وبيقابل الكل بابتسامة الصبح .. ازاي انت لو مدير هتمشيه لو هو شغله مش كويس؟ هل المفروض يمشي أصلاً؟

‏نجاح أي حد في شغله بيعتمد على ٣ حاجات مهمة، موهبة فطرية talent، مهارة بيعرفها وبيقويها skill، حاجة بتشجعك تشتغل زي انك حابب شغلك او بتاخد فلوس كويسة او عليك اقساط motivation .. لو واحدة من التلاتة مش موجودة هتبقى فيه مشاكل.. ممكن نعتبر (لطف) الشخص ده حاجة منهم؟ ممكن نعتبرها موهبة

‏هل ده لوحده كفاية؟ لأ طبعًا .. طيب ايه اللي بيحصل؟ اللي بيحصل انه لو مفيش في الشركة معايير بتقيس مدى جودة الشخص في شغله والحاجات المطلوبة من كل دور، واعرف احدد بيها الشخص ده بيؤدي المطلوب منه ولا لأ، هتبقى دايمًا الموضوع متروك للعاطفة في اختيار مين يقعد ومين يمشي ومين ياخد زيادات

أسهل شخص ممكن تتخلى عنه هو Incompetent jerk لأنه من غير تفكير ده واحد لا بيعمل شغله كويس ولا حد بيطيقه .. أصعب شخص تعرف تقيّمه وبتبقى هتتجنن وترفده بس بسبب ذكاؤه مش عارف تعمل حاجة هو The competent jerk ده غير انه مفيد للشركة لو عندك معايير تقييم واضحة هتلاقيه جامد في معظمهم ..

‏طبعًا The competent nice guy ده نعمة من عند ربنا وأعتقد ان الاسم واضح وبيشرح نفسه .. يتبقى آخر نوع وهو The incompetent nice guy اللي زي ما بنقول انه مُرهق في التعامل ولو مديره شخص عاطفي فا غالبًا مش هياخد قرارات عنيفة، وعلى فكرة وجود الشخص ده مضر مش للشركة بس ولكن للباقيين كمان

‏مش كل الناس هتتجاهل انه مش مفيد علشانه شخص لطيف، هتلاقي ناس متضايقة لأنهم في نفس التيم وبنفس التايتل واحتمال المرتب بس شايلين شغل أكتر وبينجزوا أسرع.. ‏لو مدير الشخص اللطيف ده حاول انه يديله feedback يشتغل عليه وخلاه ياخد فرصة واتنين وتلاتة ومحصلش تغيير، تبقى مشكلة محتاجة حل جذري

‏مشكلة الشخص اللطيف غير الكفء كانت موجودة دايمًا سواء مكان اشتغلت فيه او سمعت عنه .. فيه شركات نسبة النوع ده ١٠٪ وفيه شركات بيوصل لـ٦٠٪ يعني من كل ١٠ فيه ٤ شايلين الشغل كله وفيه ٦ لُطاف بيشتغلوا معاهم بس إنتاجيتهم وكفائتهم لا تُقارن بيهم بس مستحيل حد يتجرأ وياخد قرار يزعلهم ..

‏تعمل ايه لو انت مسؤول عن تيم فيه حد من النوع ده؟ الإجابة انك تكون عادل وتحط أسس تقييم متظلمهوش ومتظلمش غيره .. لو هو اجتماعي وبيتواصل كويس مع الناس يبقى شاطر في نقطة واحدة وهي communication، بس فيه نقط تانية زي technical excellence, initiatives, delivery هتبقى أرقامه فيها ضعيفة

‏في أسوأ الأحوال لو مش قادر تاخد الخطوة بعد ما حاولت معاه شهور كتير انه يشتغل على مشاكله، يبقى متساويش بينه وبين ناس مجتهدة اكتر من الناحية المادية او الدور اللي بيلعبه في الشركة .. علشان ده مش قرار صح وهيخسرك الناس اللي بتشتغل بجد.. أو فكر معاه في دور تاني محتاج موهبته بنسبة أكبر

‏طيب لو انا أصلا الشخص اللطيف غير الكفء، اعمل ايه؟ الحقيقة ان دي موهبة جميلة وبتخليك تكسر حواجز كتير وبسرعة، بس ماينفعش تعتمد عليها بس كل يوم.. استخدمها بس اشتغل على المهارات اللي في صميم متطلبات شغلك، علشان حتى لو الدنيا ماشية دلوقتي، ممكن ييجي مدير عملي أكتر ومايعجبهوش الكلام ده

💡ممكن تلاقي تفاصيل أكتر في الـthread ده على تويتر .. شكرًا 🙏🏻