[Arabic] Tips on how to stay productive and decent in a remote-work environment

وسط الزحمة الافتراضية بتاعت الشغل remotely وكمية التوتر اللي بتيجي للواحد من كمية الطرق اللي الناس ممكن توصلّك بيها أي ساعة في اليوم .. فيه شوية حاجات محتاجين ناخد بالنا منها او نفتكرها علشان بتفرق في شغلك وطريقة التعامل مع اللي حوليك وبتخليك شخص لطيف الناس تحب تتعامل معاه ✨⬇️

١- معظم الشركات بتدي الناس اوبشن الشغل في اي وقت، بالتالي مينفعش تتضايق لو وصلك ايميل او مسدج على slack/teams برّه اوقات العمل بتاعتك .. الحاجات دي اسمها async tools for comm. وانت مش مُلزم ترد في ساعتها، تقدر ترد تاني يوم في اوقات عملك المفضلة واعمل mute للأدوات دي بعد الوقت ده

٢- ماينفعش تقلل من أهمية طلب أو ميتينج زميلك عامله علشان انت حاليًا شغال على حاجة مهمة تانية، وماينفعش تقوله كده، لأنه أولاً مش شايف يومك ماشي ازاي ومايعرفش انت بتعمل ايه وبالنسبة له الحاجات بتاعته مهمة برضه .. تقدر تـdecline او تـpropose another time وتقول أسبابك بوضوح

٣- ماتضايقش لو انت محتاج مساعدة من حد وتلاقيه بيطلب منك تعمل ميتينج بينكم، هتقول في سرّك ايه الأڤورة دي ما نتكلم وخلاص .. لنفس السبب اللي قلناه فوق هو ممكن يكون معاه حاجة أهم او مرتّب يومه أو يمكن حتى مديره من النوع اللي بيشوف كل واحد بيعمل ايه في يومه .. لذلك بلاش تفترض سوء الظن

٤- طبعًا هتتعصب لو قالك ابعتلي كمان agenda للميتينج 😀 - ده بيتنّك علينا ولا ايه؟ الحقيقة انه لا خالص .. هو عاوز يعرف هتتكلموا في ايه ما يمكن يبقى عنده حل سريع، حاجة يبعتهالك تقراها، هو يقرا ويحضّر قبل الميتينج، يبعت الميتينج لشخص هيكون أفيد منه، وهكذا .. انا عامةً باعمل كده

٥- لما كنا بننزل الشركة كل يوم كنا بنشوف بعض وفي ٣٠ ثانية ممكن اعرف الـtask دي واقفة فين .. بس الوضع اتغيّر دلوقتي وضروري ان التيم بتاعك يعرف انت بتعمل ايه علشان لو احتاجوك او علشان مديرك يوفر وقت مكالمات واسئلة .. محتاج كل يوم تعمل 3 checkpoints تعمل فيهم ابديت، تبعت ميلز، وهكذا

٦- بتزهق لما الناس بتسألك كتير وبشكل متكرر؟ لو افترضنا انه مش دلع وتقصير منهم فا ده معناه انك محتاج (تكتب) اكتر، كتابة الـdocumentation هتوفّر عليك ساعات من الرغي والتكرار .. الكتابة مفتاح سحري لنجاحات مهمة جدًا أهمها توفير وقتك على فكرة .. انا فيه أيام بقضّي ربعها بكتب docs

٧- فكّر في أنسب وسيلة للي انت محتاج توصله، لو عاوز تعمل alignment وهتعمل ميتينج فيه ناس كتير، فكّر كويس هل محتاج ده ولا انك تكتب ايميل فيه كل التفاصيل وتبتدي تجاوب على كل سؤال بشكل منظم ولا تدخل ميتينج فيه ٢٠ شخص غالبًا هتلاقي الميتينج فقد معناه وضيع وقتهم ودخلهم في متاهات

٨- شوف الـcalendar بتاعت غيرك وانت بتبعتله ميتينج، وافترض دايمًا انه هيرفض الميتينج لو انت عملته فوق ميتينج تاني موجود عنده .. نفس الكلام بالنسبة ليك، لازم ترد سواء انك جاي الميتينج او مش هتيجي .. مينفعش اللي باعت الـinvitation يخمّن ده او يتفاجئ انك ماجيتش

٩- خليك لطيف وعندك تعاطف/empathy .. لو مش هتعرف تساعد بسرعة ممكن ترد وتقوله انا هاحاول اشوف وقت متاح النهاردة معلش، علشان فيه ناس كتير بتعاني في الشغل ريموتلي وفيه شوية رهبة وقلق وأحيانًا بيقضّوا ساعات على مشكلة ممكن تخلص في خمس دقايق لو سألوا (او حد سأل عليهم) .. شجّعهم يسألوك

١٠- اسأل على اللي حوليك وعلى باقي التيم حتى لو من غير سبب وخلّي فيه دايمًا تواصل بينكم علشان محدش فيكم يستتقل خطوة طلب المساعدة او يبقى خايف يقلق الشخص التاني .. الشغل الريموت بيحوّل بعض الناس لأشخاص الكل بيتجنّب الكلام معاها علشان خايف من رد فعلهم فا حاول ماتكونش انت منهم

وأخيرًا، معظم الناس خلاص اتعودت على الشغل بشكل remote وبالتالي مهم جدًا انك تحافظ على كونك شخص مُتاح في أوقات العمل، وفي نفس الوقت ماتخليش الشغل ياخد معظم وقتك في البيت، وحاول برضه كل اسبوع انك تشتغل في مكان او اتنين مختلفين علشان الروتين بيبقى متعب أحيانًا