The leaders who are "too good to be true" are not always that good!

Photo by Jehyun Sung on Unsplash

The leaders who are "too good to be true" are not always that good!

هنتكلم النهاردة عن Team leader/Manager العظيم واللطيف اللي بياخد باله من التفاصيل، بيخاف على التيم وبيقف معاهم في أي مشكلة، مش بيحطهم تحت ضغط وأول واحد بيحل المشاكل شخص too good to be true مش كده؟ الحقيقة -للأسف- انه المميزات دي لو موجودة على طول ده معناه كارثة .. ازاي طيب؟

كعادة معظم الناس اللي بتاخد أدوار قيادية لأول مرة، دايمًا بيكون فيه حماس انك تثبت نفسك للي حوليك وللتيم علشان يثقوا فيك .. ده ممكن يخلي عندك شوية صفات تبان انها كويسة ولكنها مش مفيدة خالص على المدى الطويل وهتضرك وتضرهم .. الموضوع بيحصل بحُسن نية وبغرض انك تساعد مش لأسباب وحشة

من الكتب المُفضلة ليا كتاب Multipliers اللي بيتكلم بالتفصيل عن أنواع القادة وطرقهم في القيادة ومميزات وعيوب كل طريقة .. لما قريته من سنتين اكتشفت حاجات كنت باعملها من زمان مكانتش أحسن حاجة رغم انها تعتبر صح للوهلة الأولى، وكان فيه قرارات ممكن اخدها بشكل أذكى في وقتها .. زي ايه؟

Image

الكتاب اتكلم عن كذا نوع، منهم:

١- دور المنقذ/The Rescuer:

لو فيه مشكلة او موقف مش لطيف ممكن التيم يقع فيه، وقتها تلاقي الشخص المسؤول اتحرك بسرعة وحاول يخلص الموضوع، وبيمنع وصول الضغط تمامًا عن زمايله، بيروح يساعد بسرعة أي حد عطلان، مش عاوز حد يغلط علشان ميخليهوش يحس انه متضايق

٢- الشخص سريع الرد/The Fast Responder:

واضح من الاسم، ده شخص بتلاقيه في ثانية موجود، مش بيسيب حاجة تتعطل ومش بيخلي فيه فرصة لحد انه يشكك في سرعة التيم، بيرد الصبح وبالليل وعلى كل الايميلات، فيه مشكلة بالليل؟ بيدخل يحلها مش بيستنى الصبح ومش بيحب يكلم حد يصحيه

٣- ماكينة الأفكار/The Idea Guy:

عنده حل سريع وفعال لأي مشكلة، دايمًا جاهز بالردود وشاطر انه يوضح فكرته .. أوقات بيكون هدف الشخص ده انه يشجع التيم يفكر معاه ويقول أفكار تانية.. للأسف أحيانًا بيحصل العكس والتيم بيقول ماهي الفكرة جامدة وتعالوا نفكر في التنفيذ، أكيد مفيش أفكار أحسن!

٤- الشخص اللي مليان حماس/Always On:

هدفه على طول انه يتحرك ويشجع اللي حوليه ويخلي الميتينج كله حماس، بيشجع الكل انهم يتكلموا وبيرمي افيهات وحضوره عظيم .. برضه للأسف فيه ناس بيجيلها توتر من كل الحماس ده ومش بتعرف تتجاوب معاه، وفيه ناس برضه منطوية شوية مش بتحب الطريقة دي طول الوقت

٥- المتفائل/The Optimist:

النوع اللي دايمًا بيقول "سهلة يا جماعة هنخلص في ميعادنا - الموضوع مش صعب انتم قدها" .. الطريقة دي بتنفع مع ناس وبتبقى سبب توتر وقلق لناس تانية وبيبتدوا يقلقوا من احتمالية انهم مايعرفوش يخلصوا شغلهم وهل فعلاً الموضوع سهل أوي وانا اللي مش شاطر كفاية؟

اللي بيرد بسرعة والمنقذ هما اكتر نوعين هتلاقيهم .. فيه منهم اللي بيعمل كده متعمد علشان الأضواء والاهتمام يبقوا عليه دايمًا، وفيه بيكونوا بيعملوا كده علشان خايفين على الناس اللي شغالين معاهم .. خلينا في النوع الطيب ، دول طريقتهم بتؤدي لشوية مشاكل مش لطيفة ..

- اللي حوليهم مش بيعرفوا ياخدوا قرارات من غير الليدرز دول علشان مش واثقين في نفسهم، وماتعرضوش لظروف تجبرهم يتصرفوا - بيكونوا مستنيين ان حد يقول الفكرة وهننفذها ازاي لأن مهما هيفكروا في حاجة أكيد التيم ليدر هيقول حاجة أذكى

- رد فعلهم على المشاكل بطيئ لأنه الطبيعي ان مديرهم هيرد والموضوع هيخلص كالعادة - مش بيغلطوا كتير علشان مفيش فرصة، وبالتالي مش بيتعلموا بسرعة ولا هيكبروا بسرعة لأن شغلهم معظم الوقت تنفيذي وروتيني - مش هيكونوا مبسوطين علشان التوقعات دايمًا في السما بسبب وجود مديرهم في التيم

بالنسبة للشخص اللي بيعمل كده: هتحصله مشاكل من نوع انه دايمًا هيبقى مشغول في التفاصيل ومش عارف يحط أولويات صح، مش هيلاقي حد من التيم يعتمد عليه ويـdelegate حاجات ليه، مش هيعرف يكبر في شركته علشان لازم يعمل كل الحاجات بنفسه، ومش هيعرف يغيّر التيم او ياخد اجازة علشان الدنيا هتقف!

الموضوع احتاج وقت علشان أغيّر الطريقة اللي كنت باشتغل بيها في الأول، لأن كانت فيها شوية من الصفات دي وبالتالي كنت أنا في مشكلة والتيم اللي باشتغل معاه وقتها كمان.. عامةً الشغلانة دي كلها هي حكاية مستمرة من الـunlearning and learning كل يوم

💡 تقدروا تلاقوا تفاصيل ومناقشات أكتر حول الموضوع ده في الـthread ده على twitter، شكرًا ..